ТУСГАЙ МЕХАНИЗМЫН ЖОЛООЧ НАРЫГ БЭЛТГЭХ СУРГАЛТАД 31 ЖОЛООЧ, ОПЕРАТОР ХАМРАГДАЖ БАЙНА

Сонгинохайрхан дүүргийн Засаг даргын Тамгын газар болон “Зорчигч тээвэр-2” ОНӨААТҮГ хамтран тусгай механизмын жолооч бэлтгэх санамж бичиг байгуулсан. Энэ хүрээнд өнөөдөр тусгай механизмын жолооч бэлтгэх сургалт эхэллээ. Сургалтыг “Зорчигч тээвэр-2” ОНӨААТҮГ-ын “Нарны зам” сургалтын төвөөс зохион байгуулж зам  цэвэрлэгээний 8 байгууллага, хог тээвэрлэлт ачилтын 5 байгууллагын 31 жолооч, оператор хамрагдаж байна.

Тусгай механизмын жолооч нарыг бэлтгэх сургалт 14-21 хоног үргэлжлэх ба 2 өдөр онол, үлдсэн 80 хувь нь дадлагаар үргэлжилнэ. Сургалтад хамрагдснаар М болон C ангиллын мэргэшсэн жолооч, тусгай механизмын оператор болж төгсөнө. Ийнхүү тусгай механизмын жолооч нарыг бэлтгэснээр тохижилт нийтийн аж ахуйн байгууллагуудын боловсон хүчнийг мэргэшүүлэх, хүний нөөц нэмэгдэх боломж бүрдэж байна.